Наманган вилояти Поп туманида туғилган Дониёр Қодиров тиббиёт коллежини тугатиб, муддатли ҳарбий хизматни ўтаб бўлгач, шартнома асосида хизматни давом эттиришга қатъий қарор қилди. Бугунги кунда 3-даражали сержант Д. Қодиров алоҳида вазифаларни бажарувчи сафарбарлик гуруҳи бош мутахассиси – фелдшер лавозимида хизмат қилмоқда.
– Хизмат фаолиятим ўзимга жуда ёқади, – дейди Дониёр Қодиров. – Қатъий ҳарбий интизом, аниқ кун тартиби – булар айни менбоп. Оилам ва яқинларим мен билан фахрланишади. Турмуш ўртоғим Фотима билан уч ёшли Мустафо исмли ўғилни вояга етказяпмиз.
Нуршод Бозоров Навоий вилоятининг Нурота туманида туғилган. 2019-йилдан
буён катта мутахассис-ўқчи лавозимида хизмат қилмоқда. 3-даражали сержант Н. Бозоров бўш вақтларида оғир атлетика ва шарқ яккакураши билан астойдил шуғулланади.
– Ҳар бир эр йигит Ватан ҳимоячиси бўлиши керак, – дейди Нуршод Бозоров. – Хизмат йиллари давомида дўстлик, оғир дамларда сафдошларнинг елкадош бўлиши нима эканлигини чуқур англаб етдим. Кўп фарзандли оилада ўсганман. Ота-онам Маматқул ака ва Матлуба опа тўрт ўғил, бир қизни вояга етказишди. Укаларим Навоий кон-металлургия комбинатида ишлайди.
– Касб-ҳунар коллежини тамомлаб, экскаватор оператори ёрдамчиси сифатида фаолият олиб бордим, – дейди кичик сержант Отабек
Қодиров. – Ҳарбий хизматни ўтаб бўлгач, контракт бўйича хизматни давом эттиришга қарор қилдим. 2018-йилда мазкур ҳарбий қисмга келдим, қисқа муддатли курслардан сўнг алоҳида вазифаларни бажарувчи гуруҳда пулемётчи этиб тайинландим. Ота-онам, қариндошларим Бухоро вилоятининг Қоракўл туманида истиқомат қилишади. Ҳар йили меҳнат таътили пайтида рафиқам Латофат ҳамда ўғилларим Акобир ва Жавоҳир билан туғилиб ўсган масканимизга дам олгани борамиз.
Борис КЛЕЙМАН,
ўз мухбиримиз.
Суратда: (ўнгдан чапга) 3-даражали сержантлар Нуршод Бозоров ва Дониёр Қодиров, кичик сержант Отабек Қодиров.