Маҳкумларга инсонпарварлик тамойиллари асосида яратилаётган шароитлар кўпларининг тақдирини ижобий томонга ўзгартирмоқда. Энди муассасалар фақат жазо ўтайдиган жой эмас, балки одам ўзини англайдиган, касб ўрганадиган, илм оладиган ва ҳаётини қайтадан бошлашга тайёрланадиган масканга айланмоқда. 

 Умида Шоумарованинг ҳаёт йўли ҳам бунинг яққол мисолидир. У ИИВ ҳузуридаги ЖИЭД Биринчи минтақавий ҳудудига қарашли 21-сонли колонияда жазо муддатини ўтаёганида бу ерда ташкил этилган гўзаллик салонида тажрибали мутахассислардан сартарошлик сирларини ўрганди. 

 Жазо муассасаларида маҳкумлар учун яратилаётган шароитлар нафақат касб ўрганиш, балки маънавий ва интеллектуал ривожланишга ҳам хизмат қилмоқда. Турли маърифий тадбирлар, китобхонлик кечалари, «Заковат» интеллектуал ўйинлари уларнинг дунёқарашини кенгайтирмоқда. Дарвоқе, маҳкумалар ўртасида ўтказилган «Заковат» интеллектуал ўйинида Умиданинг жамоаси фахрли биринчи ўринни эгаллади. Яқинда сартарошлик бўйича у тегишли сертификатни олиб, бошқа манзил колониясига ўтказилди. 

– Жазо ўтаётганимга бир йилдан ошди. Шу вақт ичида хатойимни англаб ет­дим. Қилмишимдан қаттиқ пушаймонман. Илгари ҳаётга енгил-елпи қараган эканман. Энди эса ҳар бир дақиқанинг қадрига етяпман. Озодликка чиққач, ўз касбим орқали инсонларга наф келтирмоқчиман. Тарих фанини яхши кўраман. Оилам бағрига қайтгач, бу ерда ўрганган касбимни давом эттириш баробарида, албатта, университетга ўқишга кираман, – дейди Умида қатъий ишонч билан. 

 Бугун мамлакатимизда амалга оширилаётган ислоҳотлар инсон қадрини улуғлашга қаратилгани билан аҳамиятлидир. Жазони ижро этиш муассасаларида маҳкумлар касбга ўқитиляпти, таълим бе­риш, маънавий тарбия ишларини кучайтириш орқали уларнинг жамиятга мослашувига кенг йўл очилмоқда. 

 Адашган инсонга берилган иккинчи имконият нафақат унинг келажагини, балки бутун бир оиланинг тақдирини яхши томонга ўзгартириши мумкин. Умида каби маҳкумлар эса бу имкониятни қадрлаб, ҳаётида янги саҳифа очишга тайёр. 


Иномжон РАҲИМХЎЖАЕВ, 

маёр.