– Жорий йилнинг 3-апрел куни маҳаллани айланиб юрганимда, бир аёлнинг бақир-чақири эшитилди. Зудлик билан товуш келган томон югурдим. Борсам, йигирмага яқин фуқаро тўпланган, аёл эса 4–5 яшар болани қўлидан қўймай «ёрдам беринглар»дан нарига ўтмаётганди. Шошганимдан бармоқларим билан тилини олдинга тортдим ва болани оилавий шифокорлик поликлиникасига олиб бордим. Тезда тиббий ёрдам кўрсатилгани боис боланинг ҳаёти сақлаб қолинди. 

Кейин маълум бўлишича, розмозлик О.Болтаева беш ёшли Шаҳбоз исмли набирасининг иситмаси кўтарилгани боис поликлиникага олиб келган экан. Шифокорлар муолажа қилишиб, иситмасини тушири­шади. Шундан хурсанд бўлиб, буви набираси билан кабобхўрлик қил­моқчи бўлишади. Ҳали ошхонага кирмасдан, яна набиранинг тоби қочиб қолади...  

Лавҳамиз қаҳрамони Вобкент тумани ИИБ ЖХХ ҲПБ профилактика инспектори лавозимида хизматни бошлаганига кўп бўлгани йўқ. Касб сирларини унга туман ИИБ бошлиғи ўринбосари, маёр Азиз Раҳмонов ва ҲПБ бошлиғи, капитан Шерзод Саидов ҳамда профилактика катта инспектори, капитан Рамиз Бозоровлар устозлик қилиб, тизимнинг ўзига хос жиҳатлари, иш юритиш тартибидан сабоқ беришди.

– Музаффаржон ёш бўлишига қарамай, хушмуомалалиги, фуқаролар кўнглига йўл топа олиши, керак бўлганда қатъиятлилиги боис кўпчилик­нинг ишончини қозонган, – дейди маҳалла раиси Жобир Ҳота­мов. – Шунинг учун ҳам катта-ю кичик ҳар қандай масала бўйича унга тортинмай мурожаат қилади. Зарур бўлган пайтда йўл-йўриқлар, маслаҳатлар олишади. 

У маҳалла еттилиги ва фаоллари билан 1200 га яқин хонадонларнинг иссиқ-совуғидан хабардор бўлиш билан бирга, жиноятчилик ва ҳуқуқбузарликларнинг олдини олиш, ободонлаштириш ишларига камарбаста бўлиб келишяпти. Бундан ташқари, айни пайтда профилактик ҳисобга олинган 19 нафар муқаддам судланган ва спиртли ичимликка ружу қўйган шахс билан мунтазам суҳбатлар ўтказиб боряпти. Шунингдек, арзимас сабабларга кўра жанжал кўтариб, қўшнилар тинчини бузадиган одамлар ҳам доимий назоратда. Яна 

12 та оила-турмуш доирасидаги оилавий жанжалкаш профилактик ҳисобга 

олинган бўлиб, уларни ҳам ярашти­риш чоралари кўрилди.   

– Ўғлимиз Музаффаржон ёш бир боланинг ҳаётини сақлаб қолгани учун шундай ўғлим борлигидан фахрланаман, – дейди отаси Элмуҳаммад ака ғурурланиб.

Мирзоқул АҲАДОВ,

ўз мухбиримиз.

Бухоро вилояти.