Тошкент шаҳрида қурилиш ташкилотида ишлаб юрган Ф.Р. содир этган фирибгарлик жинояти учун қидирувга берилган эди. Аммо у жазодан қутулиб қолишни ўйлаб ўзи туғилиб ўсган Хўжайли туманига қочиб келиб, изини йўқотмоқчи бўлди.
Уйда бекор ётиш қийин экан. Орадан беш-олти кун ўтиб, уйида зерикканидан бозорга айланишга чиққан Ф.Р. ҳудудда хизмат фаолиятини олиб бораётган ички ишлар органи ходимининг синчков назаридан қочаман деб хатога йўл қўйганини тушунганида кеч бўлганди. Чунки катта сержант Бахрам Сагидуллаэв унинг яширинишга уринаётганини пайқаб қолганди. Шу боис ундан текшириб кўриш учун ҳужжатларини сўрайди. Натижада унинг қидирувдаги шахс экани маълум бўлиб, қўлга олинади.
Б.Сагидуллаэв 1978 йили Хўжайли туманида туғилган. Муддатли ҳарбий хизматни ўтаб келганидан сўнг 1999 йили ички ишлар органларидаги илк хизмат фаолиятини Нукус шаҳар ИИБ ҳузуридаги Қўриқлаш бўлимида сафдор ходим сифатида бошлайди. 2005 йили вазирлик патрулъ-пост хизматига ўтказилиб, ҳозирги кунда ушбу хизматда катта сержант унвонида хизмат қилмоқда.
Катта сержант Бахрам Сагидуллаэв ўтган хизмат фаолияти давомида тинчлик-осойишталикни асраш, ҳуқуқбузарлик ва жиноятчиликка қарши курашишга муносиб ҳисса қўшиб, ҳамкасбларига намуна бўлиб келмоқда. Биргина ўтган йили у шахсан 3 та жиноятни фош этишга муваффақ бўлди.
Азамат Пирниязов,
ўз мухбиримиз.
Қорақалпоғистон Республикаси.