Косон тумани марказий шифохонаси рўпарасида ўрнатилган светофорнинг қизил чироғида “Лада ларгус” автоулови тўхтаб турган вақтда туманнинг “Машъал” Мфйда яшовчи фуқаро Ў.Т. бошқарувида бўлган “Тико” орқа томонидан келиб уриши натижасида йўл-транспорт ҳодисаси рўй берди.
Туман ИИБ ЖХХ ЙҲХБ инспектори, катта сержант О.Суюнов воқеа жойига етиб борди ва тегишли ҳужжатларни расмийлаштирди. Мастлик ҳолатини аниқлаш бўйича ҳайдовчи Ў.Т. тиббий текширувдан ўтказилганида эса, унинг мастлик даражаси оғир экани аниқланди. Табиийки, бу ҳолат ҳам расмийлаштирилиб, автомашина вақтинчалик жарима майдонига жойлаштирилди.
Орадан бир неча ўтгач, ўзини Ў.Т.нинг яқин дўсти эканлигини айтган фуқаро Д.Н. тўпланган ҳужжатларни судга оширмаслик ва ҳеч қандай чора кўрмаслик эвазига инспекторга 400 АҚШ доллари миқдорида пора таклиф қилади...
Ҳамкорликда ўтказилган тезкор тадбир давомида, фуқаро Д.Н. катта сержант О.Суюновга 400 АҚШ доллари миқдоридаги пулни пора тариқасида берган вақтида ашёвий далиллар билан ушланди.
Тизимда кўп йиллардан бери виждонан хизмат қилиб келаётган катта сержант О.Суюнов яна бир ўзининг хизмат бурчига, қасамёдига садоқатини намоён этди.
Ўз мухбиримиз.
Қашқадарё вилояти.