Зарафшон шаҳрида яшовчи Марина Ивановнанинг (воқеа иштирокчиларининг исмлари ўзгартирилган) уч нафар ўғли бор. Уларнинг ҳаммаси Россияда яшайди. Фарзандлари: “Она, уйни сотинг-у, ёнимизга келинг”, - деб қўйишмади. Шунинг учун Марина Ивановна ҳам нафақага чиқдию, Россияга кетишга қарор қилди. Уйини 22 минг Ақш долларига баҳолаб сотувга қўйди.
Зарафшон шаҳрида истиқомат қилувчи Азиз Арслонов уйни сотиб олди. Олди-сотди жараёнида иккови яқиндан танишиб ҳам олишди. Пулларнинг 20 минг Ақш долларини банк орқали ўғиллаарига жўнатишга ҳам Азизнинг ўзи ёрдам берди. Шундан сўнг Марина Ивановна Россияга кетиши ҳақида айтганида, “Ўзим сизни аэропортга кузатиб қўяман”,- деди.
Учиш санаси етиб келганида, Азиз Арслонов ўз машинасида уй эгаси билан йўлга чиқди. Йўлда Азиз ҳийла ишлатди - машинаси бузилиб қолганини айтиб, аёлдан телефон чироғини тутиб туришини сўради. Марина Ивановна чироқ тутиб турган пайтда, гўёки машина салонидан ускуналар олган каби бўлиб, унинг сумкасидан 3140 Ақш долларини олиб қўйди. Манзилга етганда, Марина Ивановна йўл ҳақи тўламоқчи бўлганида, “ҳожатбар” йигит бу ишни чин кўнгилдан, савоб учун қилганини, пул тўлаш шарт эмаслигини айтади. Ундан миннатдор бўлган аёл аэропортда текширувдан ўтаётганда сумкасидаги пуллари йўқлигини билиб қолади. Шу заҳоти бу ҳақда аэропортда хизмат ўтаётган ИИБ ТХТБ ходимларига айтади. Ходимларнинг саъй-ҳаракатлари натижасида ҳали узоққа кетиб улгурмаган Азиз Арслонов қўлга олинди.
Маҳлиё ХОЛОВА,
“Постда” мухбири.
Навоий вилояти.