Катта сержант Алиёрбек Мирзаэв патрул-пост баталёнида икки йил хизмат қилгач, Андижон вилояти ИИБ ППХ ва ЖЦБ хизмат итлари питомниги инспектор-кинологи лавозимига тайинланган. Кинология хизмати бошлиғи, маёр Дониёрбек Муродалиев унга устозлик қилиб, ўз амалий тажрибасини сингдириб, хизмат итларини ўргатиш усуллари билан таништирди.

Ҳозирги кунда у кинология бўлинмасининг 3-гуруҳ командири. Бу тажрибали мутахассис томонидан кўпгина жиноятлар «иссиқ изида» фош этилган. 

Яқинда тезкор вакиллар томонидан ўтказилган махсус тадбир давомида Андижон тумани «Дархон» маҳалласида яшовчи И. Х. 

0,93 грамм «гашиш»ни 30 минг сўмга сотмоқчи бўлганида қилмиши фош бўлди. Қўлга олинган шахс истиқомат қиладиган уйда тинтув ўтказилди. Катта сержант А. Мирзаев ўзининг «Лайма» лақабли хизмат ити билан тадбирда иштирок этди. Тегиш­ли буйруқни олган «Лайма» ёрдамчи хоналарни ҳидлай бошлади ва тез орада пластик пакет топишга муваффақ бўлди. Экспертлар хулосасига кўра, пакетда 1,57 грамм оғирликдаги «гашиш» гиёҳвандлик моддаси борлиги аниқланди.

Катта сержант А. Мирзаэвнинг хизмат даврида тарбиялаган шогирдлари кўп. Ҳозирги кунда сержант Бобур Қосимов ва сафдор Сарвар Ўрмоналиэвга устозлик қилмоқда. Алиёрбек келажакда офицер бўлиш мақсадида Наманган муҳандислик-технология институти сиртқи бўлимининг 2-босқичида таҳсил олмоқда. 

– Машғулотлар давомида жониворни тушуна олиш ва меҳр бериш кейинчалик ижобий натижаларга эришишда қўл келади. Аста-секин хизмат итингиз қандай ривожланаётганини кўрасиз ва бу бир-бирингизни тушуниш учун ёрдам беради. Машғулотлар сизга ҳам, хизмат итингизга ҳам қувонч бахш этувчи, пировардида ҳаётингизни бойитадиган ришталарни мустаҳкамлаш йўлидир, – деди суҳбат якунида катта сержант Алиёрбек Мирзаэв.

Борис КЛЕЙМАН,

ўз мухбиримиз.

Андижон вилояти.

Суратда: катта сержант Алиёрбек Мирзаэв «Лайма» билан.