Лавҳамиз қаҳрамони илк хизмат фаолиятини 1978-йилда Нурота туманида вақтинчалик сақлаш ҳибсхонасида милиционер лавозимидан бошлаган эди. Меҳнацевар, қийинчиликдан чўчимайдиган ёш йигит қисқа вақт ичида ҳамкасблари орасида ўз ўрнини топди. 

У 1982-йилда патрул-пост бўлинмаси командири, бир йилдан сўнг участка инспектори вазифасида, 1985-йилдан туман ИИБ Навбатчилик қисмида, 1987-йилдан эса Тергов бўлимида самарали хизмат қилди. Бу даврда кўплаб жиноятларни очиш, қонунбузарларни қонун ҳукмига топширишга муваффақ бўлди. 

1998-йилдан эътиборан салкам 10 йил давомида Нурота тумани ИИБ бошлиғининг шахсий таркиб билан ишлаш бўйича ўринбосари лавозимида фаолият юритиб, иззат-икром билан пенсияга кузатилди. У ўзи кўз юмиб очгунча ўтган қисқа фурсат, дея таърифлаган бу йиллар мобайнида муносиб шогирдлар етиштиришга улгурди. 

Айни пайтда унинг ишини ўғиллари – подполковник Акбар Азимов жазони ижро этиш тизимида, маёр Аваз Азимов эса Чирчиқ шаҳридаги ҳарбий қисмда давом эттиряпти.

– Ўтган умримга ачинмайман. Фаолиятим давомида шахсий манфаатимни давлат, халқ манфаатидан устун қўйма­дим. Касбим ортидан ҳалол топганим билан рўзғор тебратдим. Фарзандларим ҳам шу кунларни кўриб катта бўлди, ўрнак олди. Баъзи танишларим: «Акмал ака, шунча йил ички ишлар органида хизмат қилиб ҳеч қандай бойлик орттирмадингиз-а?!» деб қолишади. Мен бундайларга аҳамият бермайман. Асосийси, маҳалла-кўй, қариндош-уруғларим, яқинларим орасида ўзимга яраша ўрним, обрўйим бор, – дейди истеъфодаги маёр А. Азимов. 

Акмал Азимов 2007-йилда пенсияга чиққач, Нурота туманидаги «Истиқлол қоракўл наслчилик» масъулияти чекланган жамиятида юрисконсулт лавозимида фаолият олиб борди. Корхона ҳужжатларини қонунга мувофиқлаш­тириш, хўжаликлар билан тузилган шартномаларни ҳуқуқий жиҳатдан баҳолаш каби масъулиятли ишларни амалга оширди.

Айни пайтда кексалик гаштини суряпти. Томор­қасида турли сабзавотлар ва мевалар етиштиради. У 6 нафар фарзанд  учун жонкуяр ота,  15 на­фар набиранинг  севимли бобожони. 

Акмал Азимов ўзи истиқомат қилаётган «Бўдиқ» маҳалласи фаоллари­дан. Маҳалладаги барча тадбирларни ташкил этишга ўз ҳиссасини қўшмоқда. Бундан ташқари, маҳалладаги ёш оилалар вакилларига турмуш, фарзанд тарбияси борасидаги ҳаётий тажрибаларидан сўзлаб беради, йўл-йўриқ кўрсатишдан эринмайди.

Маҳлиё ХОЛОВА,

ўз мухбиримиз.

Навоий вилояти.