Хўжайли туманида яшовчи А. Нуриллаев телеграм каналлардан бирида бежирим болалар кийимларини арзон сотиб олиш ҳақидаги хабарни ўқиганидан кейин ҳаловати бузилди. Гап шундаки, онлайн-дўконда кўрсатилган маҳсулотлар анча арзон эди. У кийимларни кўпроқ сотиб олиб, уни қайта сотиш орқали анча фойда кўриш мумкинлигини ўзича режа қилди. Эълонда кўрсатилган телефон рақамига қўнғироқ қилиб савдолашди. Сўзлашув чоғида онлайн-дўкон юритувчиси агар пулни ўтказиб берса, хоҳлаганча товар етказиб бера олишини таъкидлади.
Унинг сўзларига ишонган А.Нуриллаев ўзини кўрмаган сотувчининг банк пластик картасига 8 миллион 520 минг сўм пулни ўтказиб берди. Пулни ўтказиб бўлиб, маҳсулотни қачон олиши мумкинлиги юзасидан сотувчига қўнғироқ қилганида бирданига унинг рақами ўчирилганлигини билди. Бошида унчалик хавотирга тушмади. Аммо, орадан икки-уч кун ўца ҳам телефон рақамининг фаоллашмаганини кўриб, хавотири анча кучайди.
Бу ҳақида туман Ички ишлар бўлимига мурожаат қилишга мажбур бўлди. Ҳолат юзасидан ўтказилган тезкор қидирув тадбирлари натижасида фирибгарнинг шахси аниқланиб, унга нисбатан жиноят иши қўзғатилди.
Азамат ПИРНИЯЗОВ
“Постда” мухбири.
Қорақалпоғистон Республикаси.