Одатда устоз ўз касбининг ҳар бир икир-чикирини ҳам айтавермайди. Эҳтимол, бу билан шогирдининг синчковлигини, зукколигини синаб кўрмоқчи бўлар?! Чинакам шогирд эса устозининг ҳар бир ҳаракатига, гап-сўзига эътиборли бўлиши керак.
Катта лейтенант Эркин Олтинов бу борада устозлари синовидан муваффақиятли ўтган. 2019-йилда ИИВ Академиясини тамомлаган қаҳрамонимиз илк фаолиятини Қизилтепа тумани Иибда бошлади. 2021-йилдан бери Навоий шаҳар ИИБ ЖХХ ҲПБ профилактика инспектори лавозимида хизматини давом эттирмоқда.
– Эркин шогирд сифатида менга бириктирилган пайтдаёқ зукколиги, тиришқоқлиги ва синчковлигини сезганман. Фуқаролар билан суҳбатлашаётганида эса ҳуқуқий билими нечоғлик чуқур эканлиги билиниб турарди, – дейди унинг устози подполковник Мирмуҳсин Нормуҳаммедов.
“Янгиариқ” маҳалласидаги хонадонларнинг бирида бир гуруҳ шахсларнинг спиртли ичимлик истеъмол қилиб, шовқин кўтаргани қўшниларнинг норозилигига сабаб бўлди. Мазкур хонадонга етиб борган катта лейтенант Эркин Олтинов вазиятни ўрганди. Суҳбат чоғида тўполончилардан бирининг тўрталамиз деб гапираётгани унинг эътиборини тортди. Чунки хонада 3 киши бор эди.
Эркин тўртинчи шахсни топиш учун бошқа хоналарни кўздан кечирди. Қараса, бир ойдан буён пробасия бўлинмаси ходимлари талабларини бажармай қочиб юрган ҳамда велосипед ўғирлаганликда гумон қилинаётган Т.Р ошхонанинг бурчагига бекиниб олган эди. Шу тариқа қонунбузар қўлга олинди.
Маҳлиё ХОЛОВА,
“Постда” мухбири.
Навоий вилояти.