Ertasi kuni barmoq izlarining yaroqlilarini ajratish hamda daktiloskopik bazadagi izlar bilan taqqoslashni oʻrgatgandi. Mabodo ishim koʻngildagidek chiqmasa, oʻsha vazifani qayta-qayta bajarishga undardi. Shu tarzda Jizzax viloyati IIB Ekspert-kriminalistika markazi eksperti, kapitan Keldiyor Alibekovning shogirdi sifatida sohaning nozik sirlarini oʻzlashtira boshlagandim.
U nafaqat chuqur bilimi, balki samimiy hamda ochiqkoʻngilligi bilan meni qoyil qoldirardi. Shu maʼnoda undagi ezgu xislatlarni oʻzimga yuqtirishga astoydil intilganman. Nazarimda, Keldiyor aka ichki ishlar organlari tizimida faoliyat yuritmaganida, albatta, ajoyib oʻqituvchi boʻlardi.
Yana uning hamma ishga ulgurishi bizni hayratga soladi. Chunonchi, navbatchiligining ertasi kuni voqea joyiga otlanganiga koʻp bora guvoh boʻlaman. Shuningdek, ekspert-kriminalistlar oʻrtasida oʻtkaziladigan koʻrik-tanlovlarga tayyorgarlik koʻrish va qator yutuqlarni qoʻlga kiritishning uddasidan chiqadi. Jinoyatlarni fosh etish borasidagi muvaffaqiyatlari haqida gapirmasa ham boʻladi.
Tabiiyki, saʼy-harakatlariga yarasha IIV hamda viloyat IIB tomonidan koʻp bora faxriy yorliq va tashakkurnomalar bilan taqdirlangan. Koʻksini «Ichki ishlar organlarida benuqson xizmatlari uchun», «Aʼlo xizmatlari uchun» koʻkrak nishonlari bezab turibdi. Oilasi ham havas qilgudek. Farzandlaridan biri poytaxtdagi Bojxona institutida, boshqasi IIV Jizzax akademik litseyida taʼlim olayotir.
Hozirda Jizzax viloyati IIB Ekspert-kriminalistika markazi bosh eksperti,
podpolkovnik Keldiyor Alibekovning men kabi oʻndan oshiq shogirdlari bor. Shu maʼnoda shaxsiy tarkibimiz
21 yillik tajribaga ega ustozimizni behad qadrlaydi. Xususan, men sohada neki yutuqqa erishgan boʻlsam, barchasida Keldiyor akaning hissasi bor, deb oʻylayman. Hamon ustozimdan bilmaganlarimni soʻrayman.
Dilafroʻz PARDAYEVA,
podpolkovnik.
Jizzax viloyati.
Suratda: Jizzax viloyati IIB bosh eksperti, podpolkovnik Dilafroʻz Pardayeva ustozi, podpolkovnik Keldiyor
Alibekov bilan.