Lavhamiz qahramoni ilk xizmat faoliyatini 1978-yilda Nurota tumanida vaqtinchalik saqlash hibsxonasida militsioner lavozimidan boshlagan edi. Mehnatsevar, qiyinchilikdan choʻchimaydigan yosh yigit qisqa vaqt ichida hamkasblari orasida oʻz oʻrnini topdi.
U 1982-yilda patrul-post boʻlinmasi komandiri, bir yildan soʻng uchastka inspektori vazifasida, 1985-yildan tuman IIB Navbatchilik qismida, 1987-yildan esa Tergov boʻlimida samarali xizmat qildi. Bu davrda koʻplab jinoyatlarni ochish, qonunbuzarlarni qonun hukmiga topshirishga muvaffaq boʻldi.
1998-yildan eʼtiboran salkam 10 yil davomida Nurota tumani IIB boshligʻining shaxsiy tarkib bilan ishlash boʻyicha oʻrinbosari lavozimida faoliyat yuritib, izzat-ikrom bilan pensiyaga kuzatildi. U oʻzi koʻz yumib ochguncha oʻtgan qisqa fursat, deya taʼriflagan bu yillar mobaynida munosib shogirdlar yetishtirishga ulgurdi.
Ayni paytda uning ishini oʻgʻillari – podpolkovnik Akbar Azimov jazoni ijro etish tizimida, mayor Avaz Azimov esa Chirchiq shahridagi harbiy qismda davom ettiryapti.
– Oʻtgan umrimga achinmayman. Faoliyatim davomida shaxsiy manfaatimni davlat, xalq manfaatidan ustun qoʻymadim. Kasbim ortidan halol topganim bilan roʻzgʻor tebratdim. Farzandlarim ham shu kunlarni koʻrib katta boʻldi, oʻrnak oldi. Baʼzi tanishlarim: «Akmal aka, shuncha yil ichki ishlar organida xizmat qilib hech qanday boylik orttirmadingiz-a?!» deb qolishadi. Men bundaylarga ahamiyat bermayman. Asosiysi, mahalla-koʻy, qarindosh-urugʻlarim, yaqinlarim orasida oʻzimga yarasha oʻrnim, obroʻyim bor, – deydi isteʼfodagi mayor A. Azimov.
Akmal Azimov 2007-yilda pensiyaga chiqqach, Nurota tumanidagi «Istiqlol qorakoʻl naslchilik» masʼuliyati cheklangan jamiyatida yuriskonsult lavozimida faoliyat olib bordi. Korxona hujjatlarini qonunga muvofiqlashtirish, xoʻjaliklar bilan tuzilgan shartnomalarni huquqiy jihatdan baholash kabi masʼuliyatli ishlarni amalga oshirdi.
Ayni paytda keksalik gashtini suryapti. Tomorqasida turli sabzavotlar va mevalar yetishtiradi. U 6 nafar farzand uchun jonkuyar ota, 15 nafar nabiraning sevimli bobojoni.
Akmal Azimov oʻzi istiqomat qilayotgan «Boʻdiq» mahallasi faollaridan. Mahalladagi barcha tadbirlarni tashkil etishga oʻz hissasini qoʻshmoqda. Bundan tashqari, mahalladagi yosh oilalar vakillariga turmush, farzand tarbiyasi borasidagi hayotiy tajribalaridan soʻzlab beradi, yoʻl-yoʻriq koʻrsatishdan erinmaydi.
Mahliyo XOLOVA,
oʻz muxbirimiz.
Navoiy viloyati.