Nurobod tumanining «Doʻstlik» mahallasida yashovchi notinch oila roʻyxatida turuvchi Nozima Rustamova (ism-sharifi oʻzgartirildi) 2 yildan beri qaynakalari va ovsinlari oʻrtasidagi oʻzaro kelishmovchilikdan aziyat chekib tuman IIB JXX HPB xotin-qizlar masalalari boʻyicha katta inspektori, katta leytenant Shahlo Izzatovadan najot istab keldi. Fuqaroning murojaati manzilli oʻrganilib, ushbu oilada kelgusida oila-turmush doirasida jinoyat sodir boʻlmasligi uchun himoya orderi rasmiylashtirib berildi. Shuningdek, xonadoniga kuzatuv kamerasi va tashvish tugmasi, yaʼni qoʻriqlash pulti oʻrnatildi.
Tumanda oilalar mustahkamligini taʼminlash, sharqona qadriyatlarni targʻib qilish borasida amaliy ishlar olib borilayotgan boʻlsa-da, soʻnggi yillarda xotin-qizlar jinoyatchiligi masalasi jiddiy eʼtiborni talab etyapti. Negaki, olib borilgan tezkor tadbirlar natijasida 8 nafar spirtli ichimlikka ruju qoʻygan va 3 nafar yengil tabiatli ayolning roʻyxatga tushgani jiddiy ogohlik boʻldi. Shu bois, ular bilan yakka tartibda profilaktik suhbatlar oʻtkazildi. Ushbu salbiy holatlarning sabablari oʻrganilib, oldini olish boʻyicha «Yoʻl xaritasi» ishlab chiqildi.
– Nurobod tumanida xotin-qizlar jinoyatchiligiga qarshi kurash faqatgina huquqni muhofaza qilish organlarining emas, balki barchamizning ishimiz. Xotin-qizlarni jinoyat sari yetaklaydigan yoʻl odatda toʻsatdan boshlanmaydi. U ishsizlik sabab paydo boʻladigan iqtisodiy tanglikdan, yetishmovchilik tufayli oilaviy nizolardan hamda maʼnaviy boʻshliq va huquqiy bilimning yetishmasligidan kelib chiqadi. Bu borada mahalla yettiligi oʻzaro hamjihatlikda ijtimoiy himoyaga muhtoj xotin-qizlarni aniqlab, ularning muammolarini manzilli hal etishga harakat qilishyapti. Kimningdir bandligi taʼminlansa, boshqasiga psixologik yordam koʻrsatilyapti va yana kimgadir huquqiy maslahat berilmoqda, – deydi tuman oila va xotin-qizlar boʻlimi boshligʻi Ziroat Sadinova.
Oʻrganishlarda tumanning «Sarikoʻl» mahallasida yashovchi fuqaro Gulchiroy Fayozovaga (ism-sharifi oʻzgartirilgan) turmush oʻrtogʻi muntazam ravishda tazyiq va zoʻravonlik oʻtkazib kelganligi aniqlandi. Unga himoya orderi rasmiylashtirilib, Ayollarni reabilitatsiya qilish va moslashtirish viloyat hududiy markaziga joylashtirildi. Voyaga yetmagan ikki nafar farzandini sud qaroriga asosan onasiga olib berishga erishildi.
Mahallalarda xotin-qizlar bilan oʻtkazilayotgan uchrashuvlarda jinoyat oqibatlari haqida emas, balki unga yoʻl qoʻymaslik uchun nima qilish kerakligi, oldini olish choralari, ayol qadri va shaʼni, oiladagi oʻrni haqida gapirilayapti. Har bir ayol qalbiga «Siz onasiz, siz keraklisiz, siz qadrlisiz» degan fikrlarni singdirishga harakat qilinmoqda.
Umida
MAMADALIYEVA,
oʻz muxbirimiz.
Samarqand viloyati.