Urganch shahridagi «Ishga marhamat!» monomarkazida «Xotin-qizlarga nisbatan zoʻravonlikning oldini olish va ijtimoiy reabilitatsiya qilish ishlarini muvofiqlashtirish» mavzusida seminar-trening oʻtkazildi.
Unda viloyat ichki ishlar organlarining xotin-qizlar masalalari boʻyicha katta inspektorlari, viloyat hokimligining Oila va xotin-qizlar boshqarmasi, Ijtimoiy moslashuv markazi masʼul xodimlari hamda huquqshunos va psixologlar ishtirok etishdi.
Seminar-treningda Ayollarni reabilitatsiya qilish va moslashtirish respublika markazining viloyat hududiy boʻlimi boshligʻi N. Qoʻshchanova, Respublika reabilitatsiya qilish va moslashtirish markazi xodimi
D. Shodiyeva, viloyat IIB JXX HPB boshligʻining xotin-qizlar masalalari boʻyicha oʻrinbosari, kapitan
S. Xudoyberganova, «Dialog» nodavlat notijorat tashkiloti koordinatori M.Bekmirzayev, viloyat oila va xotin-qizlar qoʻmitasi boʻlim boshligʻi M.Otajonova, trener-ekspert D.Toʻxtasinovalar soʻzga chiqib, gender tenglikni taʼminlash borasida amalga oshirilayotgan saʼy-harakatlar, xotin-qizlar huquqlari kafolatlarining qonunchilik mezonlari, ularning teng huquqliligini taʼminlash, har qanday koʻrinishdagi zoʻravonlikning oldini olish borasida amalga oshirilayotgan ishlarga toʻxtalib oʻtishdi.
– Ayollar bilan bogʻliq muammolarni qancha erta aniqlab, bartaraf etish choralarini koʻrsak, jamiyatimizda sodir boʻlishi mumkin boʻlgan noxush holatlarning, turli huquqbuzarliklarning barvaqt oldini olgan boʻlamiz, – deydi viloyat IIB JXX HPB boshligʻining oʻrinbosari, kapitan Sevara Xudoyberganova. – Mazkur seminar-treningda aynan shu masalalar ochiq va oshkora tahlil qilindi. Turli takliflar, fikrlar bildirildi.
Ochiq muloqot tarzida oʻtgan seminar-treningda barcha ishtirokchilarga loyiha maqsadi va vazifalarini targʻib qiluvchi materiallar tarqatildi.
Xudoybergan JABBOROV,
«Postda» muxbiri.
Xorazm viloyati.