Америкалик Эдит Мервей-Трейна дунёнинг энг кекса пауэрлифтери сифатида тан олиниб, Гиннес рекордлар китобига киритилди.
Аслида, Эдит аввалбошдан оғир атлетикачи эмас, рақс мураббийи эди. 91 ёшида у янги шогирди Кармен Гутвортнинг таклифи билан тренажёрлар залига борди. «Аввалига у ерда машқ бажараётган одамларни шунчаки кузатиб ўтирдим, кейин бир-иккита штангани кўтариб кўришга аҳд қилдим. Шундан сўнг мунтазам равишда шуғулланишни одат қилдим ва Кармен билан бир жамоага тушдим», дея ҳикоя қилади у.
Тез орада Мервей-Трейна кўпгина мусобақаларда иштирок этиб, совринларни қўлга кирита бошлади. Рекордчи хонимнинг тан олишича, сўнгги бир неча йил ичида шу қадар кўп мукофотга сазовор бўлганки, ҳатто уйида уларни қўйишга жой қолмаган.
Эдит ҳозиргача спортнинг пауэрлифтинг тури билан шуғулланиб, турли мусобақаларда қатнашиб келмоқда ва 18 дан 68 килограммгача оғирликни кўтара олади. Бир асрга тенг умр кўрган ва ҳамон тетик ва бардам кекса спортчи машғулотларни тўхтатиш ниятида эмас.
Гулчеҳра АЗИМОВА тайёрлади.