Тан олайлик. У иштирок этган жанг саҳналарини берилиб томоша қилмаган, унга ўхшаб жасур ва довюрак бўлишни истамаган бола бўлмаса керак.
Бутун дунёни ўзининг бетакрор жанг санъати билан ҳайратланишга мажбур қилган афсонавий актёр, режиссёр, жанг санъати устаси Брюс Ли 1940 йил 27 ноябрда Ақшнинг Сан-Франциско шаҳрида дунёга келди. Брюс Ли ёшлигидан кинода суратга туша бошлаган. Илк марта 3 ойлигида «Қизнинг тилла эшиги» номли филмда суратга тушган. Каттароқ бўлганида эса Ли ўсмирларни, етим ва урушқоқлар ролини ижро этган. 14 ёшида актёр ча-ча-ча рақси бўйича чемпионатда ғолиб бўлиб, ундан сўнг кунг-фу билан шуғулланишга қарор қилган.
Брюснинг устози афсонавий Ип Маннинг таъкидлашича, у жуда иқтидорли бола бўлган. Илк ролларига сабабчи мана шу жанг санъатидир.
Ли ўзининг карераси давомида шарқ ва ғарб маданиятини бирлаштирган.
Кино тарихига кунг-фу жангари филмлари орқали кириб келган. Охирги филми «Ўлим ўйини» бўлиб, унда Ли сценарий муаллифи ҳамдир.
Актёр 1973 йилнинг 20 июлида «Ўлим ўйини» филмини суратга олиш жараёнида вафот этган.
Брюс Лининг «Доим мақсадга интилинг. Ўзингиз хоҳлаган нарсага эътиборингизни қаратинг ва истамаган нарсалар ҳақида ўйламанг» сингари кўплаб ҳикматли сўзлари бугун ҳам мухлислари орқали тилдан тилга ўтиб келмоқда.
Шерзод АБДУСАМАДОВ тайёрлади.