Ички ишлар вазирлигининг Хоразм академик лицейида Президентимиз томонидан илгари сурилган Беш ташаббуси доирасида ўқувчиларнинг жисмоний тайёргарлиги ва билим кўникмаларини синовдан ўтказиш мақсадида “Жалолиддин издошлари” ҳарбий-спорт мусобақалари, “Компютер дастурчиси билимдони”, “Энг яхши китобхон” танловлари ҳамда “Билимдон” интеллектуал ўйинлари доимий равишда ўтказиб борилмоқда.
Яқинда академик лицейида ўқувчиларнинг билим кўникмасини синовдан ўтказиш мақсадида “Заковат” брейн-ринг интеллектуал ўйинлари ўтказилди. Бунда Хоразм вилояти “Заковат” клуби координатори Азамат Маткаримов ҳамда “Заковат” клуби аъзоси Жалолиддин Тожиэвлар ҳакамлик қилишди. Клуб аъзоларининг билимдонлик маҳорати ўқувчиларда катта қизиқиш уйғотди. Мусобақанинг финал босқичига чиқиш “Хоразмшоҳлар” ҳамда “Лидер” жамоаларига насиб этди. Якуний беллашувда “Заковат” брейн-ринг ўйинларининг лицей биринчилигида “Лидер” жамоаси мутлоқ ғолибликни қўлга киритди.
-Лицейимизда иқтидорли ўқувчилар кўпчиликни ташкил этади,-дейди академик лицейнинг Ёшлар иттифоқи этакчиси Рустам Болтаэв.-Ушбу интеллектуал рингда бунга яна бир бор амин бўлдик. Энг билимдон, зукко ва зеҳнли ўқувчилар жамоаси пешқадам бўлди.
Ғолиб жамоа “8 декабри-Ўзбекистон Республикаси конституцияси” қабул қилинганининг 29 йиллиги муносабати билан Ички ишлар вазирлиги таълим муассасалари ўртасида бўлиб ўтадиган “Заковат” брейн-ринг ўйинларининг республика босқичида иштирок этиш ҳуқуқини қўлга киритди.
Элёрбек МАТЁҚУБОВ,
ИИВ Хоразм академик лицейи ўқув
бўлими мудири.