Ҳеч сезганмисиз, ёшимиз улғайгани сари истакларимиз ҳам катталашмоқда. Эришганларимиздан-да кўпроқ хоҳишларимиз, эҳтиёжларимиз бўй чўзмоқда. Турмуш ташвишларига қоришиқ ҳолда кечаётган умримизнинг ҳар онида, йўл-йўлакай нималаргадир эришиб, нималарнидир йўқотаётганимиз айни ҳақиқат.
Янги йил. Ҳамма байрам ташвишида… Беихтиёр болалик онлари ёдга тушади. Кўп йиллар аввал шу кунларда тенгдошларим билан биргаликда Қорбобога хат ёзганимиз ва қандай совғалар олишни ўйлаб, ширин хаёллар сурганимиз эсимда. Ҳар бир ўқув йилининг энг қизғин ҳафтаси бўлган ўша орзу-умидларга лиммо-лим кунлар бошқача эди, барибир...
Айниқса, отам ўз қўллари билан ясаб берган байрам арчаси мен ва укам учун энг катта совға эди. Бугун уйимда ундан-да ҳашаматли арча безатилган, бироқ у ўша болаликдаги отамнинг меҳр қўри билан ясатилган арчадек қадрли эмас...
Ишдан уйга қайтаётиб шундай хаёллар оғушида юрагим энтикади. Шиддат билан ўтаётган умр сонияларини ҳис қиламан. Ўтган бир йил, мен ҳаётда қандай натижаларга эриша олдим. Кимга яхшилик қила олдим, кимнинг кўнглини ола билдим, кимникини оғритдим... Бари-барисини сарҳисоб қиламан. 2024-йил қандай ажойиботлари билан ёдда қоларли бўлди? Хотирамнинг қатларига муҳрланган воқеаларни титкилайман, ўйлаб қарасам, жуда кўп ютуқларга эришибман, оиламда, фарзандларимда катта ўзгаришлар юз берибди. Орзуларимнинг кўпчилиги амалга ошибди.
Ҳатто мўжизавий тарзда амалга ошган орзуларимга қараб, шукроналикни ҳис қиламан. Инсон ҳеч қачон орзу қилишдан чарчамаслиги ва уларни катта мақсадларга айлантириши кераклигига амин бўлдим.
Йўлда кетаётиб бекат ёнидан ўтаман. Ялтироқ шаҳарнинг сершовқин бекати. Хаёлларим ялтироқ зардай сочилади. Ўтмишдаги хотира бекатимдан кейингисига ўтишим керак. Чунки уйда оилам, яқинларим байрам дастурхонига тайёргарлик кўришимни кутишяпти. Кейинги бекат эса Янги йил...
Янги йил киргунича Қорбобога хат ёзмаймизми ойи, дея сўрайди кичкина қизим. Улар билан ўтириб мен ҳам Қорбобога хат ёзаман:
«Азиз Қорбобожон! Сизни анча вақтлардан буён эсламадим. Катталикнинг катта ташвишлари билан бўлиб, сиздан қандай совға сўрашни ҳам унутиб қўйганимни ҳис қилдим. Мен бугун ўзим учун эмас, бошқалар учун сўрамоқчиман. Бу йил қопингизда шундай совғалар бўлсинки, улар ҳар бир дилга шукроналик, меҳр-оқибат улашсин. Гиналашган қадрдонлар, ака-укалар, яқинлар, жигарлар бир дастурхон атрофида жам бўлиши учун қопингизга бироз оқибатдан ҳам солиб олинг.
Оилалар ажралмаслиги, болалар сарсон бўлмаслиги учун ҳурмат ва муҳаббатдан кўпроқ олволинг. Йўлида адашганлар бўлса, тўғри йўлга қайтиши учун инсоф ва диёнатни ҳам жойланг.
Ёшларга шижоат, кексаларга шукроналик, бойларга ҳиммат, боқимандалик кайфиятида яшаётган инсонларга меҳнатга муҳаббат ҳам ола келинг, келгуси йилда камбағаллик, фирибгарликдан тортиб, коррупсиягача барчасини илдизи билан суғуриб ташлайдиган ҳалолликдан ҳам бироз улашинг. Юртимиз осмони тинч, оилаларимиз фаровон... Сизни «Янги йил» бекатида, яшил арча атрофида, оилам бағрида кутамиз».
Сизни интиқ кутувчи мухлисангиз
Феруза РАҲМОНҚУЛОВА.