Ўз навбатида, блогерларнинг жамиятнинг онг-у тафаккурига, қарашларига таъсири ортиб бораётир. Хусусан, қайсидир олимнинг бирор минтақа ёки ҳудудда кечаётган сиёсий ва иқтисодий жараёнларнинг аниқ таҳлил қилиб бериши омманинг ўша воқеага нисбатан тўғри муносабатини шакллантиришга омил бўляпти.
Қолаверса, интернет инсоннинг сўз эркинлигига доир ҳуқуқларини самарали таъминлашда қўл келаётир. Аммо мазкур эркинликдан айримларнинг асоссиз шов-шув кўтариш ёки ноқонуний пул топиш мақсадида фойдаланишаётгани кўнгилни хира қилади. Шу ўринда бир ҳамкасбимдан эшитганим мавзуга оид ҳолатни баён эцам.
«Туманимизда бир блогер ташкилот ва корхоналар бошлиқларининг айбини очиш билан шуғулланади. Кимдир раҳбарининг ноҳақлигидан шикоят қилиб келса, блогер ўша одам орқали раҳбар тўғрисида негатив материал тўплаб, уни ижтимоий тармоқда шарманда қилиш билан қўрқитади ва мурожаатчининг муаммосини ҳал қилади. Сўнг раҳбарни қисишда давом этиб, ўзи учун катта пул ундиради».
Ана шу тафсилотдан сўнг ўша «блогер»нинг «Ёутубе»даги бир нечта материалларини кўрдим. Муаллиф изоҳидаги имло хатоларига қараганда, саводи ҳаминқадарлиги, ўзини тутишидан эса ўта сурбетлиги сезилиб турарди. Очиғи, қайсидир маънода бизга ҳамкасб бўлган блогердан ранжиганим ҳолда, унга «бож» тўлаётган масъулларга раҳмим келмади. Вақти келиб, улар қилган қонунбузарликлари учун қонуний жазоларини ҳам олишига ишонаман.
Хуллас, бугун кўплаб блогерлар эл дарди билан ёниб яшаётир, тайёрлаган материаллари билан халқнинг ҳурматини қозониб, обуначилар ва кўришлар сонига кўра яхшигина пул топишмоқда. Ўз навбатида, жиғилдонини ҳаром луқма билан тўлдиришдан ор қилмаётган блогерлар эса шарманда бўлиб, қачондир қилмишига яраша жазосини олади. Зеро, бу кўҳна дунё тўғри яхшилик, эгри ёмонлик топқусини кўп бора исботлаган.
Алижон АБДУСАТТОРОВ,
ўз мухбиримиз.
Жиззах вилояти.