Birovga chuqur qazimoqchi boʻlsang – oʻz boʻyingga oʻlchab qazi, chunki oʻsha chuqurga oʻzing tushasan.

* * *

Baxtiyor damlardan keyin birdan baxtsizlik kelib qolsa, ajablanmang. Chunki ular azaldan egizakdirlar.

* * *

Bolangizga kam-kam bering – bir kamiga yaratadi.

Koʻp bermang – bir kun kelib, yuzingizni yerga qaratadi.

* * *

– E Xudo, – debdi dangasa yotgan joyida.

Shunda yonidagi sherigi: «Men uchunam Xudo devor, ogʻayni», dermish.

* * *

Keksa odamga uchta narsa kerak boʻladi: yumshoq soʻz, yumshoq taom va yumshoq toʻshak!

Jinoyatning boshi dangasalik va ishyoqmaslikdadir.

* * *

Toqqa bir kunlik sayrga chiqqan joʻralar bir-biriga qarab, maqtanishdi:

– Qoyil, yarimta qoʻyni yevoribmiz-a...

– Mana koʻrasan, yanagi safar bitta qoʻyni yevoramiz.

* * *

Qadimda bir donishmand aytgan ekan:

– Zamonlar kelar, hammaning tagida yoʻrgʻa (mashina deyilmoqchi) boʻladi, ammo bordi-keldi zoʻrgʻa boʻladi.

Darhaqiqat, jigarimizning eshigining tagidan «gʻuv» etib oʻtib ketamiz-u, bosh suqishga vaqtimiz yoʻq.

Erkin MALIK,

yozuvchi.