Ўзбекистон Республикаси Вазирлар Маҳкамасининг 2021-йил 24-август кунидаги “Ички ишлар органларида энг яхши ходимларни аниқлаш бўйича республика танловини ташкил этиш чора-тадбирлари тўғрисида”ги қарори асосида вилоят ички ишлар органларида “Энг яхши ҳудудий ички ишлар органлари бошлиғи”, “Энг яхши профилактика инспектори”, “Энг яхши терговчи”, “Энг яхши тезкор ходим” йўналишларида кўрик-танловлар икки йилдан бери ўтказиб келиняпти. Бу йил ҳам қизғин ва баҳсларга бой тарзда танловлар ўтказилди.
Танлов асосан уч босқичда ўтказилиб, иштирокчилар соҳавий хизмат, маънавий-маърифий йўналиш бўйича тест синовларини топширди, шунингдек, жисмоний ва жанговар тайёргарлик бўйича ҳам баҳслашишди. Учинчи босқичда ҳакамлар ҳайъати ходимларнинг дунёқарашлари, умумий билим ҳамда кўникмаларини синовдан ўтказди. Ғолиблар вилоят Иибда “Янги Ўзбекистонда эл азиз, инсон азиз” шиори остида ўтказилган давлатимиз мустақиллигининг 31 йиллиги муносабати билан байрам тадбири дастури доирасида бошқарма бошлиғи, полковник Ш.Алиев томонидан пул мукофоти ва қимматбаҳо совғалар билан муносиб тақдирланди.
Танловнинг “Энг яхши ҳудудий ички ишлар органлари бошлиғи” номинацияси бўйича Қоракўл тумани ИИБ бошлиғи, подполковник Жамшид Расулов ғолибликни қўлга киритган бўлса, иккинчи ва учинчи ўринларни Олот тумани ИИБ бошлиғи, подполковник Жамшид Тангриев ҳамда Пешку тумани ИИБ бошлиғи, подполковник Абдухалил Носиров эгаллашди.
Шунингдек, “Энг яхши профилактика инспектори” номинацияси бўйича фахрли биринчи ўрин Когон шаҳар ИИБ профилактика инспектори, капитан Б.Ҳакимовга насиб этди. Кейинги ўринларни Қоракўл тумани ИИБ профилактика инспектори, лейтенант Ж.Умаров ва Когон тумани ИИБ профилактика инспектори, лейтенант А.Музаффаровлар олишди. “Энг яхши терговчи” номинацияси бўйича вилоят ИИБ ҳузуридаги Тергов бошқармаси катта терговчиси, капитан Ш.Жумаев шоҳсупанинг энг юқори поғонасини қўлга киритди. Бухоро шаҳар ИИОФМБ терговчиси, катта лейтенант Л.Тошпўлатов иккинчи ўринни, Вобкент тумани ИИБ ҳузуридаги Тергов гуруҳи катта терговчиси, капитан Б.Файзуллоев учинчи ўринни эгаллади. “Энг яхши тезкор ходим” номинацияси бўйича эса фахрли биринчи ўринни Ғиждувон тумани ИИБ тезкор вакили, катта лейтенант Ҳ.Маманазаров, иккинчи ўринни вилоят ИИБ тезкор вакили, катта лейтенант Р.Раббиев ҳамда учинчи ўринни Когон шаҳар ИИБ тезкор вакили, катта лейтенант С.Ризаевлар банд қилишди.
Кўрик-танловларнинг ҳар бир номинацияси бўйича республика босқичига йўлланма олган биринчи ўрин соҳибларига зафар тиланди ва ўз устиларида янада ишлаш ҳамда тайёргарлик кўришлари таъкидланди. Қисқаси, бу каби танловлар тизимда профессионал кадрларни танлаш, ўқитиш ва тарбиялашда муҳим аҳамият касб этади, деган умиддамиз.
Ш.ЖАЛОЛОВ,
подполковник.
М.АҲАДОВ,
“Постда” мухбири.
Бухоро вилояти.