Касб фидойиси
Сирдарё вилояти ИИБ ЖХХ ЖЦБ мутахассиси, катта сержант Адҳамжон Қодиров фуқарога оғир тан жароҳат етказган шахс ва унинг шеригини қўлга олди.
Адҳамжон хизматдоши билан ўзига бириктирилган «Тараққиёт» ва «Навбаҳор» маҳаллалари оралиғидаги кўчада тунги навбатчиликни ўтаётганида, йўл четида турган аёлни кўришди. Унинг айтишича, беш дақиқа олдин кўчадан эшитилган ўзаро тортишув овози сабаб уйидан югуриб чиққан. Икки нафар шахс уни кўриб, турли томонга қочиб кетишган. Ходимлар асфалт йўлда қон изларини кўриб, ҳуқуқбузарларни қидиришга тушишди. Адҳамжон юз метрлар юргач, ёши ўттизларда бўлган қора кийимдаги шахсга кўзи тушди. Ўзини Сирдарё тумани Бахт шаҳридан эканини таъкидлаган йигитни машига ўтқазиб, ортга қайтди. У жанжал бўлганини тан олди. Уни шеригига топшириб, ўзи яна қоронғу кўчага отилди.
Кўчада дарахтлар орасидан ўттиз ёшлардаги эркак тўсатдан унинг олдидан чиқди. Қўлида пичоғи бор. У дўқ уриб, яқинлашмасликни талаб қилди. Катта сержант Адҳамжон Қодиров қаршилик кўрсатиш оғир аҳволга олиб келишини, пичоқни ташлашни айтди. Йигитни чалғитиб, қўлини қайирди-да, бир зумда зарарсизлантирди. Бу орада шериги ҳам етиб келди.
Маълум бўлишича, уч нафар эркак спиртли ичимлик таъсирида ўзаро жанжаллашиб қолишган. Улардан бири қўлида пичоқ билан шу ерда яшовчи шахсга оғир тан жароҳати етказган. Ходимлар етиб келгунча, жароҳатланган шахсни турмуш ўртоғи уйига судраб олиб кириб кетган. Қилмишидан қўрқиб кетган шахс эса шериги билан қочиб қолган. Тунги навбатчиликни ўтаётган ходимларнинг ҳушёрлиги ва жасорати эвазига жиноятчилар қўлга олиниб, жиноят иссиқ изида фош этилди.
Катта сержант Адҳамжон Қодиров Боёвут туманида туғилган. 2012 йилдан бери ички ишлар тизимида. Тўрт нафар фарзанди бор.
Абдураҳмон МУСТАФОҚУЛОВ,
ўз мухбиримиз.
Сирдарё вилояти.