– Эрта тонгда «бешлик» аъзолари ҳаммамиз идорада тўпланиб, кунлик қиладиган ишларимизни маслаҳатлашиб олиб, шунга қараб режа тузамиз – дейди маёр Шокиржон Каримов. «Хонадонбай» ўрганишларга биринчи галдаги юмуш сифатида қараяпмиз. Бешта мутасадди бирор хонадонга ўрганишга кирсак, қай­си йўналишдаги муаммо бўлса, дарров ечим топиляпти. Ҳоким ёрдамчиси бандлик, тадбиркорлик ва кредит масаласида ўз тавсияларини берса, ёшлар етакчиси оиладаги ёшлар муаммосини ўрганмоқда. Хотин-қизлар фаоли эса аёллар билан сирлашяпти. Мен эса ҳуқуқий маслаҳатларимни беряпман.

Фуқаролар йиғини раиси Моҳира­хон Турсунованинг таъкидлашича, айни кунда ҳудудда 18 нафар тадбиркор фаолият кўрсатаётган бўлса, уларнинг сонини кўпайтиришга жиддий эътибор қаратиляпти. Ҳоким ёрдамчиси шу соҳага қизиқувчи фуқаролар билан гаплашиб, амалий жиҳатдан қўллаб-қувватлаш, имтиёзли кредит олиб беришда кўмаклашяпти. 100 га яқин хонадонда иссиқхоналар мавжуд бўлиб, лимон, помидор, бодринг ва зиравор етиштирилади.

Масалан, «Аёллар дафтари» рўй­хатига олинган Муқаддам Жўраевага имтиёзли кредит асосида 5 та тикув машинаси олиб берилгач, у кичик сех ташкил этиб, қўлида ҳунари бор аёлларни иш билан таъминлади. Аҳолининг кам таъминланган қатламини иш билан таъминлаш мақ­садида 80 нафарга яқин хотин-қиз тирикотаж ва бошқа маҳсулотлар ишлаб чиқарувчи тадбиркорларга касаначилик асосида бириктирилган.

Фуқароларнинг иш билан банд бўлгани, бекорчилар­нинг йўқлиги, энг муҳими, барча ишлар ҳамжиҳатликда олиб борилаётгани туфайли «Кичик Кенагас» обод ва хавфсиз маҳаллага айланмоқда.

– Нафақат Кичик Кенагас, балки бошқа маҳаллаларда ҳам жиноятчиликни жиловлашда фахрийлар таж­рибасидан унумли фойда­ланяпмиз, – дейди Учкўприк тумани ИИБ бошлиғининг маънавий-маърифий ишлар бўйича ўринбосари, подполковник Азизбек Умаров. – Ҳар бир профилактика инспекторига ўзи хизмат олиб бораётган ҳудуддан бир нафар фахрий маслаҳатчи этиб бирикти­риляпти. Эндиликда инспекторлар фахрийларнинг ўгит ва маслаҳатларига таянган ҳолда иш олиб боришади. Ўйлаймизки, тажрибага эга устозларнинг ёрдами ёш ходимларнинг касбий маҳоратини оширишда қўл келади.

Абдувосит СИДИҚОВ,

ўз мухбиримиз.

Фарғона вилояти.