Ўзининг ҳусни-таровати, кўркамлиги билан мамлакатимиз ва хорижий меҳмонларни бағрига чорлайдиган азим пойтахтимизнинг тинчлик-осойишталигини сақлашда ички ишлар органлари ходимларининг ҳам муносиб ўрни бор.
Янгиҳаёт туманидаги Файзли маҳалласига хизмат кўрсатувчи ҳуқуқ-тартибот маскани профилактика инспектори, лейтенант Илёс Соатов ҳам ана шундай фидойи ва жонкуяр ходимлардан биридир. У куну тун мазкур ҳудуд осойишталиги йўлида тиним билмай хизмат қилмоқда.
Ёш ходимнинг ана шундай машаққатли хизматлари эвазига маҳалла аҳолисининг хотиржамлиги таъминланиб, ички ишлар органларига бўлган халқнинг ишончи янада ортмоқда.
Бугунги кунда 3 мингдан ортиқ аҳоли истиқомат қилаётган ушбу ҳудудда фуқароларнинг бекам-кўст ҳаёт кечириши учун барча имкониятлар яратилган. Шу билан бирга, маҳалла аҳлининг хавфсизлигини таъминлаш мақсадида видеокузатув камералари ўрнатиш жараёни бошлаб юборилган.
– Ҳуқуқ-тартибот маскани ходимлари ва фаолларимиз билан ҳамкорликда муқаддам судланган ва спиртли ичимликка ружу қўйган шахслар ҳамда нотинч оилалар билан доимий равишда тушунтириш ва тарғибот ишлари олиб бориляпти, – дейди мазкур маҳалла фуқаролар йиғини раиси Эркин Турсунбоэв. – Бу каби тадбирлар содир этилиши мумкин бўлган жиноят ва ҳуқуқбузарликларнинг олдини олишда муҳим пойдевор бўлиб хизмат қилмоқда.
Жумладан, яқинда ҳудуддаги хонадонларнинг бирида истиқомат қилувчи эр-хотин М.Б ва Д.К. ўртасидаги ўзаро келишмовчиликка барҳам берилиб, бунинг оқибатида келиб чиқиши тайин бўлган муаммонинг олди олинди.
Профилактика инспектори, лейтенант Илёс Соатовнинг ҳамкорликдаги ана шундай саъй-ҳаракатлари туфайли маҳалла аҳолиси тинч-осуда ҳаёт кечираётир. Бу ҳам бўлса, юртимизда олиб борилаётган кенг қамровли ислоҳотларинг ёрқин натижасидир.
Михли САФАРОВ,
“Постда” мухбири.