Ички ишлар вазирининг биринчи ўринбосари, генерал-маёр Шуҳратжон Собиров ва Бош прокурорнинг биринчи ўринбосари Баҳриддин Валиэв Сирдарё вилояти аҳолиси билан мулоқот қилди.
Ҳуқуқ-тартибот органларининг раҳбар ўринбосарлари Мирзаобод туманининг сув тошқинидан жабр кўрган, ҳозирда замонавий қиёфага эга бўлган Навбаҳор маҳалласида истиқомат қилаётган ёшлар билан учрашди. Унда ёшларнинг фикр-мулоҳазалари, таклиф ва мурожаатлари тингланди. Самимий руҳда ўтган мулоқотда эртанги кунимиз эгаларининг бандлик, тадбиркорлик, деҳқончилик учун ер олиш каби ўнлаб мурожаатлари шу жойнинг ўзида ўз ечимини топди.
Самимийлик, ўзаро ишонч руҳи сардобалик ёшлар билан бўлган мулоқотга ҳам кўчди. Табиий офат туфайли оила аъзолари қатори бошпанаси, ҳаловатидан айрилган ёшлар бугунги кунда уларга яратиб берилган шарт-шароит, бунёдкорлик учун ҳукуматимизга ўз миннатдоргини билдиришди. Ички ишлар вазирининг биринчи ўринбосари Шуҳрат Собиров мамлакатимиз ёшларининг ҳуқуқ ва эркинликларини кафолатлаш, уларнинг дунёнинг ривожланган давлатларидаги тенгдошларидан кам бўлмаган шароитларда улғайиши учун барча ишлар қилинишини таъкидлади.
Мулоқот асносида ўнга яқин сардобалик ёшларга деҳқончилик учун ер ажратиб бериладиган бўлди. Тўрт нафар навқирон қизлар келгусида тикувчилик, гўзаллик салони, қандолатчилик каби йўналишларда иш бошлайдиган бўлишди.
Абдураҳмон МУСТАФОҚУЛОВ,
“Постда” мухбири.
Сирдарё вилояти.