Яқинда ИИВ Халқаро ҳамкорлик бошқармаси, Малака ошириш институти ҳамда Эксперт-криминалистика бош маркази ҳамкорлигида Жанубий Корея эксперт-криминалистика фаолиятининг илғор тажрибаларини ўрганиш ва уни амалиётга татбиқ этиш мақсадида мазкур давлатнинг бир гуруҳ етук мутахассислари юртимизга келишди.
Улар дастлаб ИИВ Эксперт-криминалистика бош марказида рақамли ахборот-қидирув тизимлари маркази, рақамли экспертизалар ва баллистик лабораториялар билан яқиндан танишишди.
Сўнгра, делегация аъзоларига Тошкент шаҳар ИИББ Эксперт-криминалистика маркази фаолияти, вазирлик Академиясида малакали мутахассислар тайёрлаш жараёни ҳамда курсантларга яратилган шарт-шароитлар кўрсатиб ўтилди. Шунингдек улар эътиборига криминалистик техник воситалар, илмий-методик қўлланмалар ва ўқув жараёнларига жорий этилган замонавий ахборот технологиялари ҳам намойиш этилди. Энг муҳими, Академиянинг Криминалистик экспертизалар кафедрасида янги ташкил этилган лабораториялар меҳмонларда катта қизиқиш уйғотди.
Бундан ташқари, машғулотлар давомида суд-ҳуқуқ тизимида ашёвий далиллар тадқиқоти муҳим амалиёт эканлиги тасдиқланиб, сўнги илмий ечимлар борасида ўзаро фикр алмашилди ҳамда Криминалистик фаолият бўйича келгусида ҳамкорликни амалга оширишнинг устувор йўналишлари белгилаб олинди.
Ўз мухбиримиз.