Тошкент вилоятининг Юқоричирчиқ туманида ишсиз ва касб ҳунарга эга бўлмаган, ҳуқуқий ҳамда маънавий психологик қўллаб-қувватлашга зарурати бўлган уюшмаган ёшларнинг муаммоларини манзилли ҳал этиш ва уларда ватанпарварлик руҳини янада кучайтиришга багишланган тадбир бўлиб ўтди.
Унда Ички ишлар вазирлиги, Тошкент вилояти ИИББ ҳамда мазкур туман ҳокимлиги мутасаддилари ва ички ишлар органларига бириктирилган ёшлар иштирок этишди.
Тадбир аввалида эртанги кунимиз эгалари билан очиқ мулоқот ўтказилиб, уларнинг турли мазмундаги мурожаатлари тингланди ҳамда ижроси назоратга олинди. Шунингдек, ёшлар учун Тезкор вазифаларни бажарувчи сафарбарлик отряди ва кинология хизмати ходимларининг кўргазмали чиқишлари намойиш этилди.
Шу билан бирга келажагимиз эгалари Йўл ҳаракати хавфсизлиги, Патрул-пост хизмати ҳамда Эксперт-криминалистика марказининг кўчма лабораторияси фаолияти, ўқ отар қуроллар ва махсус воситалар билан ҳам яқиндан таништирилди.
Шундай қилиб, ҳақиқий ватанпарварлик руҳида ўтган ушбу тадбир сўнгида, 16 ёшга тўлган қатнашчиларга ИД-карталар ва китоблар топширилди.
Бу каби тадбирлар вилоятнинг барча шаҳар ва туманларида уюшқоқлик билан ўтказилиб келинмоқда.
Ўз мухбиримиз.