Яқинда Самарқанд вилоятида триатлон бўйича “Чалленге Самарканд” халқаро мусобақаси ҳамда Ўзбекистон чемпионати бўлиб ўтди.
Мазкур спорт байрамида дунёнинг 35 та давлатидан келган профессионал ва ҳаваскор спортчилар билан биргаликда, мамлакатимиз Қуролли Кучлари ҳамда ҳуқуқни муҳофаза қилувчи органлари вакилларидан иборат жами 2 минг 500 нафарга яқин спортчилар ҳам иштирок этишди.
Қизғин тарзда ўтган мусобақа якунларига кўра, умумжамоа ҳисобида Мудофаа вазирлигининг 1-жамоаси шоҳсупанинг юқори поғонасини забт этган бўлса, Ички ишлар вазирлиги спортчилари 2-ўринни қўлга киритишди. Мудофаа вазирлигининг 2-жамоасига эса, 3-ўрин насиб этди.
Шунингдек, 35 ёшдан юқори бўлган спортчилар ўртасида ўтказилган яккалик баҳсларида вазирлигимиз шарафини муносиб ҳимоя қилган ИИВ Махсус операцияларни мувофиқлаштириш бошқармаси катта инструктор-ўқитувчиси, подполковник Асхат Мусликин фахрли 2-ўринга лойиқ топилди.
Шу муносабат билан биз ҳам вакилларимизни ана шундай ғалаба билан самимий қутлаб, келгусида бундан-да, юқори поғоналарни забт этишини тилаб қоламиз!
Озод НАСИМОВ,
подполковник.